Covid-19: Abamaze gukingirwa bageze kuri miliyoni eshatu
Ikigo cy’Igihugu gishinzwe Ubuzima,RBC, cyatangaje ko Abaturarwanda barenga miliyoni eshatu bamaze kugerwaho n’urukingo rwa Covid-19, kuva muri Werurwe 2021, ubwo hatangiraga ibikorwa byo gukingira.
Ibikorwa byo gukingira byatangiriye ku bafite ibyago byo kwandura no kwanduza iki cyorezo cya Covid-19, barimo abakora mu nzego z’ubuzima, abageze mu zabukuru, abafite indwara zidakira ndetse n’abatanga serivisi zitandukanye.
Ni ibikorwa byakomeje gukorwa kugeza ubwo muri Kanama 2021, abaturage bose [ni ukuvuga abafite kuva ku myaka 18 kuzamura ari nabo OMS igaragaza ko bemerewe gukingirwa], by’umwihariko abo mu Mujyi wa Kigali batangiye gukingirwa Covid-19.
RBC igaragaza ko muri rusange abamaze guhabwa nibura dose imwe y’urukingo ari 3.033.940, barimo 1.725.362 bamaze gukingirwa byuzuye [ni ukuvuga abahawe dose ebyiri ziteganywa na OMS].
Imibare ya RBC igaragaza ko ku wa 9 Ukwakira 2021, abakingiwe bari 53.369, tariki 10 Ukwakira hakingirwa abantu 100.371 mu gihe tariki 11 Ukwakira hakingiwe 193.091 naho tariki 12 Ukwakira hakingirwa 135,910.
Iyi mibare ikomeza igaragaza ko abakingiwe tariki 13 Ukwakira bari 116.927, abakingiwe tariki 14 Ukwakira 2021 bari 126.418 mu gihe abakingiwe tariki 15 Ukwakira 2021, bari 63.209 naho tariki 16 Ukwakira hakingirwa 36,940.
Muri rusange kuva tariki 9 Ukwakira 2021, hamaze gukingirwa abantu 894.792 barimo 69.557 bahawe urukingo kuri iki Cyumweru tariki 17 Ukwakira 2021.
U Rwanda rufite intego yo gukingira nibura kimwe cya gatatu cy’abarutuye bitarenze mu mpera z’uyu mwaka no kuba rwakingiye 60 % umwaka utaha.
Inzego zishinzwe ubuzima mu Rwanda zigaragaza ko uko abantu benshi bakingirwa bizatuma ubuzima bugaruka, ibikorwa bitandukanye bigenda bifungurwa.
Ku rundi ruhande ariko n’ubwo abantu bakomeje gukingirwa ari benshi, Abaturarwanda bakomeje gusabwa gukomeza gukurikiza amabwiriza yo kwirinda iki cyorezo arimo kwambara neza agapfukamunwa n’amazuru no gukaraba intoki n’amazi meza n’isabune cyangwa bagakoresha umuti wabugenewe.